بسم اللہ الرحمن الرحیم
السلام و علیکم ورحمتہ اللہ وبرکاتہ
امید کرتی ہوں آپ سب خیر خیریت سے ہونگے۔ آج کی اس پوسٹ میں، میں آپکو گھر بیٹھے آپ کس طرح بازار یا ریسٹورنٹ جیسا پیزا تیار کرنے کی بیسک ٹپس یا ٹوٹکے بتاؤں گی۔ کیونکہ آج کل کے بچوں کو اگر گھر میں بھی ریسٹورنٹ جیسی کوالٹی نہ ملے تو آ جا کے وہ باہر کے بازاری کھانوں کو ہی ترجیح دیتے ہیں۔
پیزا آج کل کے بچوں کی پسندیدہ خوراک ہے جنہیں چھوٹے بچوں سے لے کر بڑے بوڑھے اور جوان بھی بڑے شوق سے کھانا پسند کرتے ہیں۔
میں نے جب نیا نیا پیزا بنانا شروع کیا، تو ہمیشہ پیزے کی بیس بازاری پیزے کی طرح نہ تو پھولتی نہ ہی نرم بنتی۔۔۔۔ جبکہ میں یہ سمجھتی سب سے اچھا پیزا بس میں بناتی ہوں۔۔۔ حالانکہ جب میں ریسٹورنٹس یا پیزا شوپس کا پیزا کھاتی تو وہ بالکل بھی میرے بنائے گئے پیزے سے میچ نہیں کرتاتھا۔۔
آہستہ آہستہ میں نے پھر اس پہ ریسرچ شروع کی، مختلف ٹی وی پروگرام دیکھے، ریسپی بکس پڑھیں، یوٹیوب پہ ہزاروں لوگوں کی ویڈیوز دیکھیں، کون کس طرح سے آٹا گوندھتا ہے، پیزے کی ٹوپنگ میں کون سی چیز پہلے آتی ہے کون سی بعد میں، کتنی دیر پیزے کو بیک کر نا چاہیے، کیسے بیک کرنا چاہیئے۔۔۔۔ وغیرہ وغیرہ وغیرہ
چلئیے دیکھتے ہیں ہم کہاں کہاں غلطی کرتے ہیںہم سب سے پہلی غلطی آٹا گوندھنے میں کرتے ہیں۔ جی ہاں آٹا گوندھنے میں۔۔۔
میری طرح زیادہ تر لوگ آٹے کو تھوڑا سا گوندھ کر چھوڑ دیتے ہیں۔ جبکہ جتنا اچھا آپ آٹا گوندھیں گے اتنی ہی اچھی اور نرم پیزے کی بیس بنے گی۔ میں پیزے کے آٹے کو ایک تو بہت کم گوندھتی, دوسرا پھولنے کے لیے بہت کم وقت دیتی تھی۔ جس سے بیک کرتے وقت پیزا نہ تو زیادہ پھولتا اور نہ ہی نرم رہتا۔جسکی پہلی وجہ آٹے کا بہت کم گوندھنا تھا۔ کم از کم آٹے کو خمیر شامل کرنے کے بعد دس سے پندرہ منٹ تک گوندھیں۔ اس سے آٹے میں گلوٹن پیدا ہو گا۔ جس سے پیزے کی ڈو چوئی بنے گی۔
اس کے علاوہ آٹے کے پھولنے میں خمیر بھی اہم کردار ادا کرتا ہے۔ آجکل مارکیٹس میں طرح طرح کے خمیر دستیاب ہیں۔ کوشش کریں اچھی قسم کا خمیر آپ پیزے کے لیے استعمال کریں۔ خمیر کو ہمیشہ نیم گرم پانی اور تھوڑی سی چینی کے ساتھ پھولنے کے لئیے رکھا کریں۔ کیونکہ چینی خمیر کے لیے کھانے کا کام کرتی ہے جس سے خمیر کو پھولنے میں مدد ملتی ہے۔ خمیر ، پانی اور چینی کے مکسچر میں کبھی نمک کا استعمال مت کریں کیونکہ نمک خمیر کے پھولنے کے عمل کو آہستہ کر دیتا ہے۔ اور ہاں خمیر کی مقدار کو آپ جتنا کم استعمال کریں گے ۔آپ کے پیزے کی ڈو نرم بنے گی۔ زیادہ مقدار میں خمیر کا استعمال بھی ڈو کی سختی کا باعث بنتی ہے ۔
اس وجہ سے آپ ہمیشہ آٹے میں نمک کو ملائیں۔ اور اس آٹے کو چھان لیں اس سے بھی آپ کا پیزا نرم بنے گا۔ جیسے کیک بنانے کے لیے خشک اجزاء کو چھاننے سے کیک نرم بنتا ہے۔ بلکل اسی طرح اگر آپ آٹے کو چھان لیں گے تو اس سے بھی پیزا کی بیس نرم بنے گی۔
یاد رکھیں ہر وہ چیز جس میں خمیر ڈالتے ہیں اسکو عام آٹے کی نسبت ذرا سا ڈھیلا گوندھا جاتا ہے۔
پیزے کے آٹے کو آپ نے کم سے کم بھی دس سے پندرہ منٹ کے لئے ضرور ضرور ضرور گوندھنا ہے۔ اس سے آٹے میں لچک پیدا ہو گی ۔ اور اتنا ہی زیادہ آپ کا آٹا اچھا گوندھنے ہوگا۔ کیونکہ اچھے پیزے کا دارومدار ہی اسکی بیس پر ہے۔ اس کے بعد آپ آٹے کو پھولنے کے لیے رکھیں۔ اب سوال یہ ہے آٹے کو کتنی دیر پھولنے دینا چاہئے۔ میں آٹے کو دو سے ڈھائی گھنٹے پھولنے کے لیے رکھتی تھی۔
جب کہ سب سے اچھا طریقہ یہ ہے کہ آپ آٹے کو اچھی طرح سے گوندھ کر ڈھک کر ساری رات پھولنے کے لیے کسی گرم جگہ پر رکھ دیں۔ کیونکہ اس سے آٹے میں ایک تو قدرتی خمیر پیدا ہو گا دوسرا جو خمیر ہم نے ڈالا تھا وہ اپنا کام کرے گا، لیکن اگر آپ اتنا لمبا انتظار نہیں کر سکتے یا بیٹھے بٹھائے پیزا کھانے کا پروگرام بن گیا ہے تو آپ صبح آٹے کو گوندھ کے رکھ لیں۔ اور شام میں پیزا تیار کر لیں۔
اب جب ایک دفعہ آٹا پھول جائے۔ تو اسکو دوبارہ سے خشک میدے کے ساتھ کم سے کم پانچ منٹ کے لئے گوندھیں۔ اس دوران پانی استعمال کرنے کی آپکو ضرورت نہیں۔ دوسری دفعہ آٹے کو گوندھ کر دوبارہ سے پھولنے کے لیے ڈھک کر رکھ دیں۔
اس دوران آپ پیزے میں استعمال ہونے والی دوسری چیزوں کی تیاری کر سکتے ہیں۔ جیساکہ سبزیاں کاٹنا، چکن کو فرائی کرنا وغیرہ وغیرہ۔۔۔
جب دوسری دفعہ بھی آٹا پھول جائے تو آپ پیالے سے نکال کر ہلکا سا گوندھ کے آٹے کو دو یا چار حصوں میں برابر کاٹ لیں۔ اب ایک پیڑے کو پیزا پین کے حساب سے گول بیل لیں۔اور اسے پیزا پین میں رکھ کر دوبارہ سے پھولنے دیں۔
لیکن یہ مرحلہ کوئی زیادہ اہمیت کا حامل نہیں ہے۔ اگر آپ کرنا چاہیں تو آپ کا پیزا اور زیادہ نرم بنے گا نہیں کرنا چاہتے تو بھی اس سے پیزے میں کوئی خاص فرق نہیں پڑے گا۔اب آپ پیزا بیس پر پیزا سوس لگائیں۔ چاہے تو آپ گھر میں خود سے تیار کر لیں یا بازار سے بنی بنائی لے آئیں۔
پیزا سوس کی ریسپی آپ نیچے دئیے گئے لنک پر کلک کر کے دیکھ سکتے ہیں۔Pizza sauce
سوس کے بعد آپ چیز ( پنیر) کی تہہ لگائیں ۔۔۔جی ہاں
صحیح سنا آپ نے۔ آپ نے اکثر دیکھا ہوگا ریسٹورنٹس یا پیزا شوپس پہ جو ہم پیزا کھاتے ہیں انکی ٹوپنگ کیسے اپنی جگہ پہ ٹھہری ہوتی ہے جس کی وجہ سوس کے بعد چیز (پنیر) کی تہہ ہوتی ہے۔ پیزا بیک کرنے کے دوران چیز (پنیر) کے پگھلنے سے پیزے پر رکھی گئی ٹوپنگ اپنی جگہ پر ٹھہر جاتی ہے۔ اس وجہ سے آپ ہمیشہ چیز (پنیر) کو پہلے پیزے پر چھڑکیں۔ 
اسکےبعد اپنی پسند کی ٹاپبگ سے پیزے کو مکمل کر کے دوبارہ سے چیز (پنیر) کی ہلکی سی تہہ لگائیں۔ اب باری پیزے کوبیک کرنے کی آتی ہے۔ میری آخری غلطی پیزے کو°180 ڈگری پر بیک کرنا تھا۔ جس سے پیزے کا کرسٹ اوپر سے پک کر سخت ہو جاتا۔ جب کہ پیزے کو صحیح ٹمپریچر پر بیک کرنے کا طریقہ یہ ہے کہ آپ جب پیزے اسمبل کر رہے ہوں تو اوون کو زیادہ سے زیادہ ٹمپریچر °500ڈگری پر گرم ہونے کے لئے آن کر دیں۔ اور اوون کے اندر پیزا سٹون یا اوون ٹرے کو اندر رکھ دیں۔ اس سے پیزا سٹون یا اوون ٹرے گرم ہو کے ہمارے پیزے کو نیچے سے اوپر تک پکنے میں مدد کریں گے
پیزے کو اوون میں سب سے نیچے والی شیلف میں رکھیں اس دوران اوون کے اوپر کی گرل کو بند کر دیں۔ صرف نیچے والی گرل کو آن رکھیں۔ جب آپ دیکھیں کہ آپ کا پیزا نیچے سے پک اور اچھی طرح پھول گیا ہے تو آپ پیزے کو اوون کی اوپر والی شلف میں رکھ کے اوپر سے پکا لیں۔ اس سے آپکے پیزے کا کرسٹ اوپر سے سخت نہیں ہوگا۔۔۔ لیجئے آپکا پرفیکٹ پیزا ہو گیا تیار!!
چکن پیزا کی ترکیب جاننے کے لیے نیچے دئیے گئے لنک پر کلک کریں۔
Chicken Pizzaفش پیزا کی ترکیب جاننے کے لیے نیچے دئیے گئے لنک پر کلک کریں۔
Pizza with tuna fish and onions
تھوڑی سی محنت اور کوشش سے اپنے پیاروں کو خوش کرنے میں سب سے زیادہ خوشی۔۔۔میں جانتی ہوں، آپ کو ہی ہو گی
امید کرتی میری ان ٹپس اور ٹرکس پر عمل کر کے اپنے بچوں کو گھر میں ہی ریسٹورنٹ جیسی کوالٹی والا پیزا بنا کے دینا اب۔۔۔۔۔آپ کے لئیے مشکل نہیں ہوگا۔
